युएलएफसी कप २०८३ : आयोजक लालमटिया निलोको शानदार जित, पहिलो संस्करण सम्पन्न

रामनगर,दाङ, २०८३ अशोज १४ गते

युनाइटेड लालमटिया युथ क्लबले पहिलोपटक आयोजना गरेको युएलएफसी कप २०८३ आयोजककै टोली युनाइटेड लालमटिया युथ क्लब निलोको शानदार प्रदर्शनसँगै सम्पन्न भएको छ।

प्रतियोगिताको फाइनलमा आयोजक लालमटिया निलोले फुटबल क्लब भालुवाङलाई ५–१ गोलअन्तरले पराजित गर्दै उपाधि आफ्नो पक्षमा पारेको हो।

फाइनल खेलमा लालमटिया निलो सुरुदेखि नै प्रभावशाली देखिएको थियो। पहिलो हाफमै तीन गोल गर्दै उसले खेलमा बलियो पकड बनाएको थियो। दोस्रो हाफमा भालुवाङले केही सुधारिएको खेल प्रस्तुत गर्दै एक गोल फर्काए पनि त्यसपछि थप दुई गोल खाएपछि खेल ५–१ मा टुंगिएको हो।

भालुवाङले अघिल्लो दिनको खेलको लयलाई फाइनलमा निरन्तरता दिन नसक्दा आयोजक टोलीविरुद्ध अपेक्षित चुनौती प्रस्तुत गर्न सकेन।

यससँगै पहिलोपटक आयोजना गरिएको युएलएफसी कप २०८३ भव्य रूपमा सम्पन्न भएको छ। आयोजक युनाइटेड लालमटिया युथ क्लबले प्रतियोगितामा दुई टोली सहभागी गराएकोमा लालमटिया निलो फाइनलसम्म पुग्दै उपाधि जित्न सफल भएको हो।

औपचारिक कार्यक्रमसँगै फाइनल खेल

प्रतियोगिताको समापन तथा फाइनल कार्यक्रम राप्ती गाउँपालिकाकी कार्यवाहक अध्यक्ष कमलापति चौधरीको प्रमुख आतिथ्यमा सम्पन्न भएको थियो। क्लबका उपाध्यक्ष श्रीधर अधिकारीको अध्यक्षतामा भएको कार्यक्रममा राप्ती गाउँपालिका–२ का वडाध्यक्ष पहलमान चौधरी, गोरखा आइडियल स्कुलका प्राचार्य वसन्त पुन मगरलगायतको उपस्थिति थियो।

प्रमुख अतिथि चौधरीले ब्यानर पढेर कार्यक्रमको उद्घाटन गर्नुभएको थियो। क्लबका सदस्य शिवरानाको स्वागत मन्तव्यबाट सुरु भएको कार्यक्रममा गोरखा आइडियल स्कुलका प्राचार्य पुन मगर तथा वडा नम्बर २ का अध्यक्ष चौधरीले शुभकामना मन्तव्य व्यक्त गर्नुभएको थियो।

पहिलो प्रयासमै ठूलो प्रतियोगिता

पहिलो संस्करणमै युएलएफसी कपलाई सञ्चालन गरेर सम्पन्न गर्न सफल भएकोमा युनाइटेड लालमटिया युथ क्लबलाई बधाई दिनुपर्ने देखिन्छ। स्थानीयस्तरमा खेलाडीलाई अवसर प्रदान गर्ने र फुटबल गतिविधिलाई निरन्तरता दिने दृष्टिले प्रतियोगिताले सकारात्मक सन्देश दिएको छ।

तर, पहिलोपटक आयोजना भएकाले प्रतियोगिताका क्रममा व्यवस्थापन तथा प्रचारप्रसारका केही पक्षमा सुधारको आवश्यकता पनि देखिएको छ। विशेषगरी प्रतियोगितासम्बन्धी सूचना नियमित र व्यवस्थित रूपमा प्रवाह गर्ने, आधिकारिक सूचना स्रोत स्पष्ट बनाउने, सम्पर्क तथा समन्वयका लागि जिम्मेवार व्यक्ति तोक्ने र खेलको समय तथा कार्यक्रम व्यवस्थापनमा थप ध्यान दिनुपर्ने देखिएको छ।

समापनको समयमा खेल सुरु हुने समय र पुरस्कार वितरणको व्यवस्थापनमा समेत केही असहजता देखिएको थियो। पुरस्कार वितरणका लागि आवश्यक प्रकाशको पर्याप्त व्यवस्था हुन नसक्दा कार्यक्रमको अन्तिम चरण केही प्रभावित भएको महसुस गरिएको थियो।

चौतारी न्यूजको सुझाव छ—पहिलो संस्करणबाट देखिएका कमी–कमजोरीलाई अनुभवका रूपमा लिएर आगामी संस्करणमा सूचना, प्रचारप्रसार, समन्वय, समय व्यवस्थापन र समापन समारोहको तयारीलाई अझ व्यवस्थित बनाइयोस्।

पहिलो प्रयासमै प्रतियोगितालाई सफलतापूर्वक सम्पन्न गरेकोमा युनाइटेड लालमटिया युथ क्लबलाई हार्दिक बधाई तथा आगामी दिनका लागि शुभकामना।