ब्राजिल–मोरक्को भिडन्तमा विश्वको नजर, स्कटल्यान्ड र हाइटी पनि मैदानमा

देउखुरी, दाङ,  जेठ ३० गते शनिबार ।

फिफा विश्वकप २०२६ अन्तर्गत समूह ‘सी’ का खेलहरू आइतबार रोमाञ्चक हुने अपेक्षा गरिएको छ । दिनको सबैभन्दा बहुप्रतिक्षित खेलमा पाँचपटकको विश्व विजेता ब्राजिलले अफ्रिकी शक्तिशाली टोली मोरक्कोसँग प्रतिस्पर्धा गर्दैछ भने अर्को खेलमा स्कटल्यान्ड र हाइटी आमनेसामने हुनेछन् ।

न्यु जर्सीस्थित मेटलाइफ रंगशालामा हुने ब्राजिल–मोरक्को खेल नेपाली समयअनुसार बिहान ३ः४५ बजे सुरु हुनेछ । विश्वकप इतिहासको सबैभन्दा सफल टोली ब्राजिल विगतका दुई संस्करणमा क्वार्टरफाइनलबाट बाहिरिएको पीडा बिर्साउँदै उपाधि यात्राको बलियो सुरुआत गर्ने लक्ष्यमा छ ।

इटालियन प्रशिक्षक Carlo Ancelotti को नेतृत्वमा रहेको ब्राजिलले २४ वर्षपछि विश्वकप उपाधि जित्ने सपना बोकेको छ । यता कतार विश्वकपमा सेमिफाइनल पुगेर इतिहास रचेको मोरक्को भने अर्को ठूलो उपलब्धि दोहोर्याउने योजनामा छ ।

फिफा वरीयताको सातौं स्थानमा रहेको मोरक्को पछिल्ला वर्षहरूमा उत्कृष्ट लयमा देखिएको छ । कप्तान Achraf Hakimi र Brahim Díaz टोलीका प्रमुख आशा मानिएका खेलाडी हुन् । ब्राजिलका लागि Vinícius Júnior, Raphinha र Alisson Becker माथि विशेष नजर रहनेछ ।

यस्तै, समूहको अर्को खेलमा ५२ वर्षपछि विश्वकपमा फर्किएको हाइटीले स्कटल्यान्डको सामना गर्नेछ । खेल नेपाली समयअनुसार बिहान ६ः४५ बजे हुनेछ ।

नवौं विश्वकप खेलिरहेको स्कटल्यान्ड नकआउट चरण पुग्ने लक्ष्यमा रहेको छ । Scott McTominay र Andrew Robertson जस्ता अनुभवी खेलाडी रहेको स्कटल्यान्डलाई समूह चरण पार गर्ने बलियो दाबेदार मानिएको छ ।

विश्वकप इतिहासमा पहिलो जितको खोजीमा रहेको हाइटी भने स्कटल्यान्डलाई चुनौती दिँदै प्रतियोगितामा सुखद सुरुआत गर्ने प्रयासमा हुनेछ । समूह ‘सी’ का यी दुवै खेलले विश्वकपको रोमाञ्च थप बढाउने अपेक्षा गरिएको छ ।